Gravhaug frå romartid og folkevandringstid. Ca. 300 e.Kr.– 550 e.Kr. Flaghaugen har gitt eit av dei rikaste gravfunn frå eldre jernalder i Norge, med både eineståande importsaker og nordisk arbeid av høg kvalitet. Han var over 40 m vid og meir enn 4 m høg og vart utgraven av sokneprest Johan Lyder Brun vinteren 1834-35. l dag viser berre omkrinsen av han på begge sider av kyrkjegardsmuren. Gravene Det vart funne tre graver. To av dei var branngraver, den eine frå yngre romartid (ca. 200 - 400 e.Kr.), den andre frå folkevandringstida (ca. 400 - 600 e.Kr.). l desse var dei brende beina lagde i ein bronsekjele. Den sentrale grava var ei jordfestegrav frå ca. 300 e.Kr. Ho var eit 3,6 m langt og 1,2 m breitt mura gravkammer fora med tre og never.

Innhaldet i gravkammeret
Den gravlagde var ein mann overmåte rikt utstyrt med våpen, personlege ting og bordservise: eit vakkert sverd i treslire dekka med lær og forgylte sølvplater, skjold med skjoldbule dekka med tjukke sølvplater, spyd, pilespiss, armring av gull, fire fingerringar av gull, nål av gull, speil av fortinna bronse, 31 spelebrikker av blått og svart glas, skålvekt av bronse, hengefat av bronse, spann av bronse med innlagd sølv, sil av bronse, drikkebeger av sølv og drikkehorn med sølvbeslag. Gullet aleine veg langt over 600 gram og gjer funnet frå Flag-haugen til det største samla gullfunnet frå norsk romartid.

Flaghaugen ligg til venstre i bakgrunnen

Høvdingen på Avaldsnes
Den mannen som vart gravlagd her, er kalla ein vestnorsk kysthøvding. Rikdomen som grava avspeglar, må vera fun-dert på våpenmakt og handel. Sjøvegen langs vestkysten av Norge var så viktig at den som hadde makta her, på sett og vis hadde kontroll med heile Sørvest-Norge.